عيله هابى على قولت الليبيين

السلام عليكم ورحمة الله وبركاته
القصة بدت وأنا في هوتيل في جربة كيف طالعه من داري بنسترخا قدام البيسين شادة بنتي في غمري وراجلي في جنبي خطمت بنت في سن المراهقة لفتتلي نظري أناقتها مع إنها لبسة خليعه,, حسيتها ليبية لإنها مكترة مكياج ومعروف عالتونسيات إنهم ما يستعملوش في المكياج المهم قعمزت أنا وراجلي وقعدنا نلعبوا في بنتنا وقعمزت البنت مقابلتني وقعدت نشبحلها مرة مرة لإنها بجديات حلوة بعد شويا جي خوها أصغر منها ممكن عمره 13 سنة أو ما يقارب خش الولد يعوم ومرة مرة يكلم في أخته في البيسين وزبطت من لهجته إنهم ليبيين لغاية توا عادي قلت في نفسي بنت لابسه عريان وهيا في تونس ممكن تكون صغيرة وأهلها فري ما يعدلوش طلعت الأم ومعاها راجل اللي هوا مفروض بو الصغار شادين في إيدين بعض لن وصلوا مع صغارهم قلنا ما شاء الله عالعيلة السعيدة نشبح في القرسون جاي ياخد في الطلبات ما خديتش في بالي فقت علي عقلي لما شفت شيشة السلتيا والتلج علي طاولتهم وقلت معقولة فيه راجل يشرب قدام صغاره عجب يا ربي,,, الألعن من هكي لما نشبح الأم شاده السبسي وإدخن بكل تقة قدام صغارها توا هدا مش هم,, لقاني راجلي ناقلة حيرتهم نوضني من جيهتهم مشينا درنا دورة وخشينا نتعشوا ,,, تعشينا وطلعنا رجعنا لنفس المكان لقينا العائلة الليبية السعيدة كلها في البيسين تعوم وشينك منظر لما تشبح مرا في نهاية الأربعينات تعوم في مايو وعليك منظر لما تشوف البنت شبه عارية وتعوم في بيكيني توا نبي نعرف هدا راجل وإلا تلب اللي معاهم
والله راني لليوم حالة العيلة مافارقتني وأنا نفكر في مستقبل البنت والولد كيف بيكون إذا كان الأم والبو بالهالمنظر
يا ربي إسترنا وإستر ولايانا ياااااااااااااااارب

خالص الشكر ارجو الردود